2009年5月8日星期五

晴天生日飯

前些天收到晴天的短訊,說約我吃個飯。我說好呀,順便交換北京的照片。我們先約在旺角中心,時間尚早便四圍逛逛,我說要買背心呀,於是買了五件,足夠一星期穿了。其中兩件是紅色的,衣襬周圍縫著雪紡泡泡摺邊,我覺得好OK 喎,價錢仲OK,才九元。於是我狂推介晴天,誰知她全完無動於衷,她說雖然好OK,不過不是她杯茶。

去了朗豪坊吃日本菜,就是吳X 祖開的那間店,很串咀的限食句半鐘。起初我還不知是晴天請客,我說我埋啦因為我要簽卡呀因為我無錢呀最後的十蚊都買埋耳環揸乾揸淨喇,她還是不慍不火地重覆說她埋單,正當我想深呼吸準備再說一次時,她才說,妳生日呀我請啦!哦,早講吖嘛,多謝晒喎!

席間,我說著我所見所聞的爆人爆事。其實於我而言我並不覺得很爆,但原來在第三者的角度看,是爆到不行的。例如我的旅行歷險記啦、同事之無奇不有篇啦、公車天謊夜談傳啦、友們的成精之路啦,等等等等。她忽然爆了一句,好爆呀,點解妳成日遇到呢啲咁爆嘅人架?!

我愕了愕,心想,係喎,點解呢?其實我都唔知。於是我說,咁我又無深究過喎。她便說,咁一定係因為妳都係咁嘅人啦!咦?有道理喎!我便說,咁爆事陸續有嚟啦,放心!

後來,我們去了H&M 看衣服。我說我好喜歡她們的首飾,浮誇耀目。我隨手拿起一朵大紅花髮夾,我問晴天,靚唔靚呀?她還是那句,靚,不過唔係我杯茶囉!說時,還要撇撇咀。我不服氣,硬說真係好靚架無嘢喎唔會好誇啫,一邊反駁她一邊證明我是對的,於是我把耳邊的頭髮隨意撥成一束,夾起大紅花。我說,真係OK 架喎!她看了看我,續說,不過呢度唔係馬拉呀!

最終我沒買大紅花,因為我實在有很多很多這種髮飾。她很驚訝,於是我不停說,其實我好誇架妳睇我做條裙都知我誇啦!結果由我在H&M 裡挑的衣飾可以證明得到我這句話,她由最初的不相信到半信半疑到深信不疑。她更說,喂妳咁誇不如放上博啦!我回應她,嘩梗係唔得啦會俾人認出點相架信我啦真係一眼就認出!我說,我靜雞雞影相發電郵給她好了。

10 則留言:

readandeat 說...

我知說的是什麼大紅花。阿包很喜歡,戴上頭後不肯除下來,嚷著我要買。不過,她看中的是一朵黑色的。我當然沒買。大吉利是咩。

Wewa 說...

八卦的我,都好想好想睇下你有幾誇呀~~
可否靜雞雞發張相給我看看:p

揚眉女子 說...

readandeat,

黑色我都有諗過架, 不過載上頭無乜特別.
哈哈, 阿包有眼光!!!!

Wewa,

妳留email 比我啦咁!

新鮮人 說...

我都八一八!
不過唔好意思問,
希望將來機會在你blog見到啦! =p

揚眉女子 說...

Wewa,

收到!

新鮮人,

留電郵啦!
係blog 度未必會放d 好爆既衫相, 因為一定認到!

Wewa 說...

好,等妳!

揚眉女子 說...

可能要等一排喎, 因為我好懶.

揚眉女子 說...

新鮮人,

got it!

匿名 說...

說起來, 揚眉的首飾等等東西很誘人呢~

記得有個entry係關於一朵棗紅色玫瑰的髮夾, 其實我很想知在哪裡買啊~~可否告訴我呢?

最近發掘了chanel 新的cristalle de vert 香水, 香氣很誘人, 可以一試~

愛化粧的人

揚眉女子 說...

我在APM 的MUK 買的:

http://www.apm-millenniumcity.com/chi/shops/shops_detail.php?id=75&sid=0

不過我買那時已經在做清貨, 不知道現在還有沒有?

chanel 新香水呀, 要去試試!!