事先張揚的張家界深度遊

我又要出走了，這次是艱苦之行，張家界鳳凰古城的一週深度遊。

自訂了機票後，便把這事擱在一旁，一直日拖一日沒意欲計劃。心想從北京回來還有一個星期，到時再想吧。但時間過得很快，明天我便要出發了，跟舊同學還未約好到底在深圳還是廣州會合，行李未打點，保險未買。明天我還要揹著背包回公司，下午才離開。

算一算，放午膳時我得叮一聲從公司飛奔打的到尖沙咀火車站，過了深圳關又要直跑去買車票上廣州，其實我還未攪清楚售票處在哪裡，只記得出關不遠。到了廣州還要直去白雲機場，趕上六點多的飛機。咳，如果我沒記錯的話，是六點多。如果一環接一環中間沒誤時誤點的話，應該是夠時間的。

昨天接到舊同學的電話，嗌晒救命發現包包太小放不完行裝，我說我不管了，大不了，不帶傘（帶便利雨衣）不帶化妝品護膚品（素顏加大墨鏡）不帶髮GEL（頭箍鯊魚夾），爛撻撻去旅行。

還有一道難題，實情我們還未訂旅舍。明天到達張家界時該已九、十點了，我膽粗粗地說唔驚嘅，出到去搵地方住應該唔難嘅。舊同學的反應是吓了一聲，狂說好驚好驚。我說，有錢就唔驚啦。嗯，其實也有少少驚啦。舊同學提議，不如搵返個導遊啦，三日盛惠四百一每人，包餐住。本來心想這個價都OK，但舊同學補充，之但係住農舍客棧都係廿五一晚咋喎！吓？！咁四百一即刻唔OK。舊同學附和，係喎我哋兩個夾埋俾八百二十，機票都係三百幾咋頂你！

就係咁，即使兩個女仔好驚好驚都好，還是堅決要真正自由行我唔理。