好喱 hea 的越南之旅－－第一天

八月十二日那天，我工作至兩點才離開公司，真係好日不發市、發市旺幾年！後來飛奔去灣仔拿回簽證，之後飛奔回家拿行李，再飛奔上蛇口搭車上廣州，好頻能，最後到達廣州已經九點了。

在酒店放好大包小包行裝之後，我和好同學打的士去步行街，買了好大包的零食。我問好同學，為甚麼要買咁多呢？她說：「旅行社啲人話越南無啖好食，叫我哋最好買定嘢食喎！」

買完零食，我們去了家麵店吃晚餐。我吃著吃著，看到一條菜虫的物體，好肥美的，於是好冷靜地夾起放在桌上，告訴我的好同學：「妳睇吓呢條嘢？」初時她還未意識到這團是甚麼物體，後來我告訴她，她好驚，大箸大箸地夾起麵狂吃，她說要「her her 聲」食完，不然會作嘔。頂，這當然不可以讓她得逞，於是我不停地說：「睇吓啦，咁大條肉虫好罕見架」、「食返條冬虫草補補」、「食得咁快小心食倒條參鬚」，於是好同學一邊吃一邊媽媽聲。最後，狂笑完一輪之後，我卻乃野：「頂吖依家輪到我食唔落呀仆X。」

於是在未吃飽的情況之下，我和好同學又在街上覓食。看到一家三蚊碗的雙皮奶，雖然好危險，不過真是好想吃。心想，唔怕啦，買重了保險，於是膽粗粗買了一碗。味道是出乎意料的好吃，但更出乎意料的是，好同學忽然問了我一個問題：「妳係咪有寫BLOG 架？」心虛的我啞了幾秒，說：「有時寫吓咁囉，咩事呢？」她說：「無呀，我有個同學話有睇開喎。」心裡一萬個驚，追問：「吓？點知係我個BLOG 先？」「係妳啦，佢話有個博友話上大陸跟團去越南玩，又係呢幾日，話可能我會見到喎。邊有咁啱吖，我再問問吓，咪估到九成係妳啦！」好感動的我立即說：「嘩，咁我要寫返篇先得！」在這裡，我要衷心對廣大讀者（尤其是好同學的同學仔）表示謝意，謝謝。

那晚回到酒店一路嚷著要早睡但又一路兩個雞啄唔斷，終於兩點才睡下來，但翌日五點又要起床。