2010年6月5日星期六

蝸居

前些天看了一小節《鏗鏘集》,講的是樓價的問題。我一直看,一直氣。

說起買樓,總有兩幫人跑出來,一面是嚷著政府要幫市民置業;另一面,支持市場自然發展,政府不應干預。當中有位八十後的受訪者,忘記了,好像是買了個何文田四百萬的單位吧,他說,沒有人想幫人供樓(租樓),但大部份人都是頭痛在首期方面。只是其實儲錢是一種磨練、忍耐,如果年輕人連買樓儲首期這個如此基本的鍛練都沒有,那麼就太輕而易舉了。

另一位同樣是八十後的受訪者,與家人同住公屋。買居屋,怕沒升值能力;買舊私樓,又嫌樓齡比自己老。看中了一個靚單位,算一算,月供七八千,分期三十年,立即依依呀呀,嘩咪供到退休?家裡有三名勞動人口的他,還要說:「七八千,唔係唔得嘅......不過都係太貴囉!」除了供款,還一直強調首期要幾十萬,唔知要儲到幾時。

我爆了句粗,無錢就唔好學人買樓啦!我從來都不覺得置業真的那麼困難,沒本事儲首期的,可以做九成半按揭,大不了多付半成保費;不想買貴樓的,就買新界遠一點的,現在交通都很方便呀;再不就把年期拉長一點,做盡三十年,還年輕嘛!方法已經有很多,別動輒旨意政府,政府不是你父母啊!

看到最後,當中一位受訪者說了一句,其實一個家庭,月入萬五至兩萬,就已經有能力買一個兩百餘萬的單位了。對,只是要犧牲很多,例如娛樂,例如進修,視乎你認為值不值得。但沒有榮耀是不需經歷痛苦的,只要你熬得過,就可以大大聲聲告訴別人,我依家係業主喇!

12 則留言:

Cooking Meow 說...

我一路睇都一路鬧。
同家人住公屋個位80後先好笑, 話佢正職+兼職一個月加埋兩萬, 一個月先儲到三千。
仲話佢自己一個人要儲5年半先可以儲到首期..
「叫埋女朋友儲係會快0的.. 唔係唔得0既..」

仲不停話唔想要居屋.. 都係私人樓好0的

又要買樓, 又要呢樣又要個樣..

好多人話要儲錢買樓, 轉個頭日日係街食, 一年去幾次shopping旅行, 電話年年轉
咁想儲到錢? 真係等到退休拎個筆MPF啦..

小瓶子 說...

帮地产商打一世工咯.

揚眉女子 說...

係喎, 不如佢成世癡呀爸住公屋啦, 買乜X 野樓.

真係好想叫佢無鏡都痾督尿照下自己乜野新鮮蘿白皮, 佢知唔知自己講緊乜呢??

揚眉女子 說...

小瓶子,

呢D 係個人選擇, 唔想幫地產打一世工, 咪跟阿爸阿媽住公屋囉! 再唔係, 租樓, 都係選擇.

我唔係話一定要買樓, 只不過好鄙視D 人又怕痕又怕痛咁.

canny 說...

我都覺得好搞笑!住近公屋,通常會買居屋或舊樓先上車,呢條茂李走去將軍睇私樓然後又無首期,又厭居屋吾保值,鬼吾知呀媽係女人咩,又無錢,就算政府支助都要還架!覺得佢好搞笑又幼稚囉。

揚眉女子 說...

係呀, 真係做佢女朋友都即刻分手.

成日就係望政府打救, 就算0 利息, 本金個二百幾萬, 佢每個月淨低個3 千都唔夠供啦!

仲好意思比人知佢每個月先儲得個3 千蚊.

canny 說...

咁又吾可以燒埋分手呢份,到底物以類聚情以共通,幾爛幾低的主張,一定有志同道合的共鳴者!呢點我絕對相信,祇係我地睇法與此君不合!

揚眉女子 說...

咁又係喎, 冤豬頭都有盟鼻菩薩!

selina 說...

我都有睇...老實講,我好難相信差唔多三十歲人,連廿萬都儲唔到...二三十萬,對買樓黎講,真係好基本..

就算人工唔高,得萬幾蚊,夠定力的話冇理由儲唔到..二三十萬,真係唔係好多咋喎。同埋,佢都幾遲先還完grant loan....

揚眉女子 說...

呢d 係佢個人有問題.

ah-yo 說...

我無睇呢集,但之前睇另一集唔知咩,又係睇到火滾。

有個女仔,大學生,唔知yr1定yr2,申請公屋!!!!! 佢話因為而家無收入未過限額可以以個人名義申請,但出黎做野後就一定超額。

問佢做咩唔儲錢買樓,佢話要儲首期有排儲,問佢咁點解唔同屋企人住慢慢儲錢,佢話鍾意自己住。大佬,我覺得公屋資源唔係expect比一個大學畢業嘅人用。

揚眉女子 說...

嘩, 我偶像yo 姐呀!! 大駕光臨!!

我以前有個同學, 就係讀緊書個陣申請公屋, 排左一兩年成功左. 佢阿爸做製衣生意, 買比層樓比佢自己住. 問佢做乜要申請公屋, 佢話拎黎擺野都好丫!