飯局最終回

上回講到R 君遲遲未落實的飯局，今天他自投羅網。先離一離題，其實我真的不明白，為甚麼一個二個有起事上來都喜歡托我傳話呢？話說今年中秋，家家工廠都打來詢問我送禮的事宜，我便旋即變成為人肉傳聲筒。

對，下午輪到R 君打來。已經幾個月沒跟他聊天了，我笑笑口問他，做乜咁好死打來呢？但得知答案後，好想爆粗。

「喂，你哋幾多人呀？」
「十四個。」我木納地回答。
「妳問吓佢哋中秋想要咩月餅吖！」
「％……＆＊＄＠！！」這已是我第N 次發脾四了。你們知唔知，假如有五間廠打來問，我要重複同一段說話13 X 5 次呢？

說起部門中的一位新同事。
「邊個嚟架？」
「新嚟架，你唔識架喇。不過OK 靚架！」好心的我打算介紹給他認識。
但已經有女的他自動省略了我的下半句。「反正唔識，不如妳拎埋佢嗰盒啦！」
「吓？」我大驚。「點解要咁做呢？」
「妳要多盒。」
「我點解要要多盒。」注意，我這句，是陳述句。
「咁一係，我寫多盒俾妳。」......他到底明唔明我在說甚麼？
夠了。「你係咪想整鬼我呀？」
「吓？對妳好啲都唔得。算。」
我覺得他分明是在玩嘢的，於是我著他把他的那盒給我。誰知他小聲告訴我，今年不知道老細會不會派月餅。聽罷，心軟的我便說：「咁一係我分兩舊月餅俾你囉，一半。」
事後愈想愈覺得，是他的苦肉計。蠢咗。

又，說起他的新居。
「喂，我去探吓你得唔得？」
「都得嘅。」
「順道探埋你條女，得唔得？」
「咁就唔得。」
「吓？驚我爆大鑊？」
「係呀，驚妳唱我呀。」
「傻啦，點會呀！唔驚你散咗走嚟纏返我咩。」
「唓，妳唔想。」
OK，我真係唔想。所以我是不會爆你大鑊的。

再又，說起那約又唔約之後再約最後失約的飯局。正確來說，是我的生日飯局。
「喂，我想約妳食飯。」
「你講咗好多次喇！」
「今次真，下星期。」
「咪住，係咪你請先？」我心虛地問。咳咳，話說上次他生日，我老屈了他埋單。
他愕了愕，才想起他上次又出錢又出力的生日飯局。「喂，有邊次唔係我請架頂妳！」
咁又係。