2010年12月15日星期三

豪言 一

作為管理階層就預咗乞人憎。

做得人上司就預咗被人改花名講是非。

下屬嘅角色係輔助上司,唔係調返轉要上司來輔助你輔助嘅角色。

唔好一邊埋怨搵得少又一邊係度死死地氣做,條氣咁唔順,可以炒公司魷魚。

人工係永遠追唔上工作量架喇,你第一日出嚟撈呀?唔好一入來就呀之呀左,依家係要你去適應公司,唔係公司適應你。

唔好人hea 你又hea,就算真係無嘢做係度hea,唔該唔好俾你上司啲敵人見到。

唔好仇視你上司一夠鐘就閃,你有本事坐佢個位先好講仇視。

愈高層愈老憑返來磨指甲,唔通同你寫紙仔寄辦?

無論你有道理定無道理,總之有咩事去到你上司度,都一定先打三十大板。

有時吃虧,人工包咗嘅。

有啲死貓,都係人工包咗嘅。

唔好投訴間公司好亂,係咁順利咁整齊就唔駛請咁多人。

多嘢做就梗架啦,唔係要你嚟做咩?

無論你認唔認同,佢都係你上司。

亦唔需要你認同,佢都係你上司。

無人要針對你呢個薯仔,唔好將自我放到咁大。

之不過呢個世界有太多薯仔將自我放大,妄想公司為佢而開,上司為佢而做。

係商業社會打工,唔係返善堂。

無能力自保,唔該埋堆。無料唔緊要但係唔該唔好扮有型。

下屬同上司無得鬥;打工仔同公司無得鬥,一係認命一係走。

7 則留言:

篤篤篤撐 說...

甘好火 ?

揚眉女子 說...

不過我覺得好岩喎...

新鮮人 說...

炒人、駡人好易,
薯仔係會忍係要受,
但凡事都留一線,
一個豬頭丙係佢上司嘅危急關頭時可以起重要作用,
人可以係兩刃刀,
有些人真係估佢唔到的!

揚眉女子 說...

咁我覺得d 說話都唔算好激, 都係事實o者, 起碼未出粗口& 人身攻擊.

SKII 說...

同意!

sujiii 說...

以下屬既角度我都覺得講得講得好岩喎...

揚眉女子 說...

SKII, sujiii,

thanks... 雖然有d harsh 不過我覺得係真言.