2010年4月21日星期三

好朋友

人生總有一些好朋友,是值得我們花心思去維繫的。

昨天R 君打來,約我下星期找個時間吃飯。我問,為甚麼咁好死忽然約我吃飯呢?早已北上的他,除了假期會偶然回港,其他日子都是在上面陪女的。他說,因為我生日呀!

啊!係咩?我真的沒印象了,依稀記得上年他生日時意粉客之約件事囉。對上一次見他,是半年前的事,那時他回來見客後還早,於是約我匆匆吃板長,當是補祝我生日(九月先補祝喎梗係食大佢。)。我說,吖唓,打來就是為了你生日呀?他說當然不是,還有事想知,就是想問問我升職了沒有。

我是感動的,他還記得我這件事。我說,升咗喇,兩個月前!他便立即埋怨我不夠老友囉,那麼久都不告訴他。我怔了怔,賴皮地反駁,咁唔通我自爆咁肉酸呀?他噓了一聲,嚷我要請吃飯。

我說,嘩大佬,我人工仲加得少過通脹呀!我是隨口說的,但他好認真地想了想,問我,咁咪好少?我說,係架!所以你仲叫我請?我連忙再說,你知唔知呀,依家搬咗辦公室我車費又多咗,食飯又貴咗,壓力又重咗,連層樓都加埋息呀!(OK 我是拉埋嚟講的。)他便好同情我地說,咁,一係我請妳囉。

哈哈,我立刻大笑起來。他人好,對我特別好,即使懷疑,都不會反駁我的話。當我再三保證沒有講大話後,他略帶不忿地說,其實我真係唔明點解次次都俾妳老點倒!

因為我哋係好朋友囉!

3 則留言:

匿名 說...

好中意你呢句呀:『人生總有一些好朋友,是值得我們花心思去維繫的。』
生命有呢d好朋友,已經好幸福!=)

Iris

揚眉女子 說...

都唔知係我好彩定佢唔好彩, 哈哈

匿名 說...

我也有這種朋友,跟他相處異常暢快﹗不過佢經常係一大班朋友面前,話我爭佢好多錢....