2010年10月30日星期六

「買唔到樓唔嫁你。」

難以想像出自一位大學生把口,還博得全場熱烈掌聲。身處一個自由市場,你有權選擇買,有權選擇唔買;有權選擇嫁、唔嫁,也有權選擇娶、唔娶,不必說得那麼迫於無奈。跟同事聊起這話題,我不以為然地回應: 「稅都未有資格納,呢位同學想政府幫你啲乜?」

十九歲,離畢業大大話話尚有兩三年,到時個市分分鐘已經冧咗一半。全香港人都心知肚明,不出數年,樓價一定大跌,那時候大概同學就算免首期都不敢買吧?很難理解香港市民的心態,沙士時跑馬地百幾萬,無人肯買情願租;到現在七百萬,個個爭住入票。不可笑嗎?

就不說沙士這個非常時期,然而如果同學真的只是純粹想「買樓」,其實一點都不難。新界區二百萬樓下,廿零年樓齡的私人住宅,其實選擇也不少。要置業,做九成半按揭供三十年,或者三成首期加二按,一樣條條大路通羅馬。請別再呻買唔到樓了,這個世界無「唔想蝕底又要賺到盡」這支歌仔唱的。

再不,調返轉,同學何不大唱反調對女友說「買唔到樓唔娶妳」?要知道現今世代女多男少,說不定女友真的會扚起心肝儲錢買樓當嫁妝免得當上剩女呢!甚麼?好荒謬?荒謬得過這位同學,和這位女友?

6 則留言:

SKII 說...

講真,如果真的有心,佢哋呢個年紀唔係講錢,呢兩件,就算請佢哋做 staffs,我都有保留...
而且,妳講關於買樓的,很有道理,另,市區其實有唔少二手居屋,四五佰呎,價錢其實仍係並車盤,但梗係冇會所丶冇海景喇!

揚眉女子 說...

所以呢d 根本係藉口, 又怕痕又怕痛.

篤篤篤撐 說...

同你撞文tim ar~~~

不過 呢, 我估係佢以為自己好識搵soundbite, 但實際係辭不達意, 問錯問題, 搞到大家都誤會了問題重心。

揚眉女子 說...

所以報紙話依家高考學生d 中文水平低囉.

匿名 說...

但係竟然博到全場掌聲, 呢班90後, 點解會養成呢種心思?

揚眉女子 說...

真係唔明, 唔知其他90 後係咪咁既心態?

想當時十九歲, 完全唔敢諗"買樓"呢樣野, 依家既十九歲, 除左諗, 仲夠膽要求. 都唔知算係成熟定幼稚.